تتجدد شهريا مع صرف رواتب موظفي غزة، المحاصرين ماليا واداريا، حكاية مواطن يسير على "الجنط"، ورغم ذلك لا يزال يزاول عمله بانتظام، مع الإشارة إلى أن بعضهم قرر أن يعمل بنسبة 50% من جهده بقدر الراتب الذي يتلقاه، وأمام المشهد المضحك المبكي أنقل منشورا لأحد الموظفين على صفحات الفيس بوك تحت عنوان: "خربشات موظف"، نصه على النحو التالي:
واحد غلبان وكحيان ومنيّل على عينه، يسألني قديش بتقبض يا أستاذ؟ قلت له 1400 شيكل البنك بيخصم 400 بيظل حوالي 1000 شيكل... خير وبركة.
بيقولي طيب والألف شيكل بيكفوك؟
قلت طبعا يكفوا بعد ما ندفع فاتورة البلدية 60 شيكل والكهرباء 140 بيظل حوالي 800 شيكل... خير وبركة.
بيقولي طيب و800 شيكل بيكفوك؟
قلت طبعا يكفوا بعد ما ندفع 150 شيكل للجوال والتليفون والنت بظل حوالي 650 شيكل... خير وبركة.
بيقولي طيب و650 شيكل بيكفوك؟
قلت له طبعا بيكفوا بعد ما ندفع رسوم الروضة 60 شيكل وباص الروضة 50 شيكل ومواصلات أولاد المدارس 120 شيكل يظل حوالي 420 شيكل... خير وبركة.
بيقولي طيب و420 شيكل بيكفوك؟
قلت له طبعا بيكفوا بعد ما أخصم منهم 120 شيكل مصروف الأولاد الأربعة شيكل لكل واحد في اليوم بيظل حوالي 300 شيكل... خير وبركة.
بيقولي طيب و300 شيكل بيكفوك؟
قلت طبعا بيكفوا خصوصا إني مش ساكن بالإيجار باشيل منهم 150 شيكل مواصلات لشغلي يظل 150 شيكل... خير وبركة.
بيقولي طيب و150 شيكل يكفوك؟
قلت طبعا يكفوا بس باعمل حساب 30 شيكل للتوكتوك الي يملألي مية حلوة يظل 120 شيكل خير وبركة.
بيقولي طيب و120 شيكل يكفوك؟
قلت له طبعا بيكفوا بس عندي بنت صغيرة بأشتري علبتين حليب في الشهر بـ 60 شيكل
وباكيتين بامبرز ب 40 شيكل يظل معي حوالي 20 شيكل أتبغدد فيهم لآخر الشهر.
قام شخرلي شخرة طويلة... وأخرج كابونتين من جيبته ووضعهم في إيدي وقال: "عليا الطلاق ما هم راجعات لأنتم أحق بها منا ... إيش اللي مقعدك في الحكومة لليوم... هات اسمك وصورة هويتك أسجلك في الجمعية والله لتغنى بالغلط.
حقوق الخربشات محفوظة للموظف، والصوت العالي ناقل فقط.