الرسالة نت
والله العظيم دي حاجة تجنن أصل الموضوع زاد عن حده أوي، نقلب في الجرايد نلاقى الكلام عن قضية جدو، نولع التلفزيون نلاقى الكلام برضو عن قضية جدو، نفتح التلاجة نلاقى الجيلي والمهلبية بيحكوا فى موضوع جدو، ويا ريت فيه كلمة واحدة في الكلام ده كله تخص كرة القدم.
إنما الكلام كله عن التوقيع والإيقاف والعقوبة والغرامة، كأننا نتكلم عن واحد متهم ورد سجون مش لعيب كرة، يعنى من ساعة ما بسلامته شرف من أنجولا ما سمعنا ولا كلمة واحدة عن أهداف جدو ولا عن إبداعات جدو ولا عن مهارات جدو.
وأنا رأيي عشان نخلص من الموضوع ده وعشان الدولة والشعب ينتبهوا لقضايانا المتلتلة ونسيبنا من العبط اللي إحنا فيه لازم الدولة تعمل قانون إنو اللي يتكلم عن موضوع جدو تاني ياخد إيقاف ست شهور وغرامة ميت ألف جنيه وساعتها الناس مش حتقول غير جملة واحدة بس " اللي يجيب سيرة جدو ربنا يبتليه بمصيبة تهدو".
